نهار قرروا يعلموني كسكسو

واحد الجمعة بحال كاع الأيام وأنا فايقة مع h10.
كلشي كان نايض وفاطر, فطرت بوحدي. الوليدة كان عندها شي حاجة ما دير وختي كان عندها شي حاجة ما تجيب فالزنقة. حصلت أنا كنغسل الماعن د الفطور فالكوزينة.
ملي جات ختي وشافتني فالكوزينة.
قالت لي: اوا ديري لينا نتي الغدا اليوم, عمرك ما طيبتي كسكسو.
وأنا ندير فيها الزعامة
وقلت: علاه مالي مكنعرفش.
دوزت min 30 وأنا كنقي فالخضرة, الوليدة فالبيت هي اللي غاتعلمني.
قالت: أ ليلة سربي , h11 هدي امتى غايطيب
وقلت: اوا صافي , أنا خدامة.
قالت: أنا من الصباح وأنا كنسمعك كتنقي فذاك خيزو.
علما نقيت الخضرة, جات الوليدو تعس عليا وأنا كننصب الغدا.
قالت: ديري هذي, ما ديريش هذي, ديري الزيت, درتي الملحة...
ملي جا وقت السميدة
قالت: ديري الما, عنداك تعجنيها, بشويا لا تخويه, ديريه يفور.
علما كيفور كسكسو التفويرة الأولى أنا جمعت الدار وشطبت. جات أصعب مرحلة هي أنك دير الما والزيت لكسكسو. خويت الكسكاس فوق القصرية ودير ايدك فكسكسو كيحرق وحركو. بلا مانعاود ليكم الاحساس كيداير.
قالت: حركيه, زيدي الما باش يشربو محدو سخون, عنداك لا تخويه.
وأنا نتفكر ناس الغيوان ملي قالوا: لي قال العصيدة باردة يدير ايدو فيها.
وأنا كنحس بصباع يديا كيتحرقو فوسط القصعة قالي واحد الراس : هذي غير البنة اللي كتخرج منهم, وكلما كيكبر بنادم كلما كتزاد فيه البنة. عليها العيالات الشارفات اللي كيطيبو فالعراسات كيكون طيابهم بنين, لأنهم اكتسبوا البنة مع الزمان, وكتخرج من صباع ايديهم ملي كيطيبو, بحالي أنا دابا.
ومع قوت التفويرات كيتلف ليا الترتيب, فين لي كيديرو فيها الما, فين لي كيديرو فيها غير الزيت, وفين اللي كيديرو فيها الملحة.
المشكلة هي أنه خاصو يطلع زوين لأنه الغدا أهم وجبة, والى طلع عيان مغايلقو ما يكلوا.
والأكثر من ذلك هو ملي وصلات h30: 1 ها شي واحد كيصوني, طلات الوليدة, صدق ولد خالتي جاي من أكاد ير, يصاوب شي وراق فالرباط, وجا يتغدى عندنا قبل ما يمشي مع h15 باش يخاد وراقو.
وأنا نتفكر قصعتي وبان ليا بحال الى وليت كنرغبها تكون بنينة.
عار الله أ القصرية ماتحشمينيش!!!!!!
ما رتحيت تاناض خويا, وسولتو:
وقلت: واش بنين الغدا؟
قال: اه.
وقلت: واش ما خاصو والو؟
قال: لا.
الحصول الله ما خيبنيش, وطلعة قصعة ما شهيتكم فيها, و كيما قالوا الأولين :
عند الفورة يبان الحساب .
والله لا ما قفلتي لا فورتي.